Published On Mar 17, 2023
ក្រមព្រហ្មទណ្ឌ នៃព្រះរាជាណាចក្រកម្ពុជា ឆ្នាំ២០០៩ ទោសត្រូវបានបែងចែកជា ០៣ (បី) ប្រភេទគឺ៖
* មូលទោស
* ទោសបន្ថែម
* ទោសជំនួស
១៖ អំពីមូលទោស អនុលោមតាមមាត្រា៤៣ នៃក្រមព្រហ្មទណ្ឌ មូលទោស រួមមានទោសដាក់ពន្ធនាគារ និងទោសពិន័យជាប្រាក់ ហើយការពិន័យត្រូវគិតជាប្រាក់រៀល ។ សូមបញ្ជាក់ផងដែលថា ប្រាក់ពិន័យដែលទទួលបាន ត្រូវបង់ចូលជាថវិការដ្ឋ ពោលប្រាក់ពិន័យនេះមិនមែនជា ប្រាក់សំណងរដ្ឋប្បវេណីដែល ភាគីបង្កបង់សងជម្ងឺចិត្ត ទៅជនរងគ្រោះទេ ។
២៖ ទោសបន្ថែម គឺជាទោសបន្ទាប់បន្សំដែល ចៅក្រមសម្រេចបន្ថែមក្នុងមូលទោស ហើយទាល់តែតុលាការសម្រេចថា បុគ្គលរូបណាមានមូលទោសហើយ ទើបតុលាការអាចសម្រេចដាក់ទោសបន្ថែម ពីលើមូលទោសនោះបាន លើសពីនេះទៅទៀត ទោសបន្ថែម បង្កើតឡើងក្នុងគោលបំណង ដើម្បីឱ្យការដាក់ទណ្ឌកម្មមាន ភាពសមស្របទៅនឹងអំពើល្មើសច្បាប់ ដែលបុគ្គលរូបនោះបានប្រព្រឹត្ត ឬធានាដល់ការអនុវត្តគោលការណ៍ ឯកត្តកម្មនៃទោស ។
៣៖ ទោសជំនួស ត្រូវបានបែងចែកជា ០២(ពីរ) គឺ៖ ទោសការងារសហគមន៍ និងទោសស្ដីបន្ទោស ហើយដើម្បីប្តូរមូលទោសមកជាទោសការងារសហគមន៍ និងទោសស្ដីបន្ទោសបាន លុះត្រាតែជនជាប់ចោទទទួលទោសដាក់ពន្ធនាគារ ដែលមានអតិបរិមាតិចជាង ឬស្មើនឹង ៣ (បី) ឆ្នាំ ទើបតុលាការអាចប្រកាសទោសការងារសហគមន៍ និងទោសជំនួសបាន។